L'uniun grischuna d'art
Il museum d'art dal Grischun a Cuira è in exempel che instituziuns culturalas pon sa sviluppar mo, sch'i dat umans che crain vi d'ellas e las sustegnan.
L’onn 1900 è vegnida fundada l’uniun grischuna d’art ed uschia è vegnì tschentà il fundament per la collecziun e per il museum. Ella ha sia sedia a Cuira ed è ina secziun da l’uniun svizra d’art. L’uniun grischuna d’art è responsabla per il program d’exposiziun. Ella finanziescha onn per onn la preschentaziun d’exposiziuns temporaras sco er d’occurrenzas e funghescha sco editura da publicaziuns e da catalogs d’exposiziun. Ultra da quai è l’uniun grischuna d’art responsabla per la butia dal museum e per il café dal museum, entant ch’il chantun procura per il manaschi e per il mantegniment da l’edifizi e metta a disposiziun il persunal per preschentar las exposiziuns e la collecziun.
Cun passa 1600 commembras e commembers, fauturas e fauturs è l’uniun grischuna d’art francada bain en la populaziun. Las commembras ed ils commembers mussan in grond engaschament finanzial ed ideal per il museum d’art dal Grischun a Cuira.
L’uniun grischuna d’art ha la finamira da svegliar e da promover en il chantun Grischun l’interess per l’art figurativ en sia diversitad mediala. Ella organisescha exposiziuns temporaras en il museum d’art dal Grischun.
Confurm a ses concept directiv realisescha l’uniun grischuna d’art exposiziuns d’auta qualitad e fa ch’il museum d’art dal Grischun è in’exclusivitad en il chantun.
Preambel
Dapi il zercladur 2016 dispona il Museum d’art dal Grischun – sper la Villa Planta renovada – d’in edifizi nov dals architects Barozzi Veiga. La purschida da localitads per preschentar la collecziun e concepir exposiziuns temporaras è uschia pli che sa dublegiada. En la dimensiun actuala po il Museum d’art dal Grischun preschentar sia collecziun d’art impurtanta ed organisar parallelamain exposiziuns temporaras che pon ussa vegnir sviluppadas, planisadas e realisadas en il spazi amplifitgà.
En il rom dal contract concludì cun il chantun Grischun – sco proprietari dal Museum d’art a Cuira – organisescha l’Uniun grischuna d’art exposiziuns temporaras ed occurrenzas en il Museum d’art dal Grischun. Il Chantun la metta a disposiziun gratuitamain las localitads dal museum d’art sco er il persunal necessari.
L’Uniun grischuna d’art po concepir libramain il program. Il maletg directiv preschent sa basa sin il maletg directiv 2020-2023 e gida a formular l’intent e la finamira dal program d’exposiziuns dals onns 2024-2027. Las experientschas rimnadas dapi l’avertura dal Museum d’art dal Grischun amplifitgà il zercladur 2016 furman la basa per il svilup dal maletg directiv preschent. Il maletg directiv 2024-2027 tegna quint en spezial da la dinamisaziun da process socials e resguarda la digitalisaziun s’avanzanta da noss mintgadi. Ultra da quai permettan las lingias directivas formuladas en quel da metter accents tenor las pretensiuns al museum ed a las exposiziuns che sa midan d’in cuntin.
La cumbinaziun da segirar l’incumbensa ed esser avert per svilups contemporans marchescha il maletg directiv 2024-2027. Quel permetta a la direcziun artistica da concepir il program d’exposiziuns en il rom da sias incumbensas e cumpetenzas.
Intent
L’Uniun grischuna d’art contribuescha essenzialmain a la relevanza sociala dal Museum d’art dal Grischun.
L’Uniun grischuna d’art vul reflectar cun sias exposiziuns temporaras ed occurrenzas las caracteristicas localas ed entrar en in dialog cun temas globals ed universals da l’art.
L’Uniun grischuna d’art è averta per experiments artistics. Las exposiziuns temporaras en il Museum d’art dal Grischun surprendan cun preschentar artistas ed artists main enconuschents sco era cun porscher novs access e novas vistas sin posiziuns artisticas gia enconuschentas.
L’Uniun grischuna d’art promova cun sias exposiziuns temporaras la vasta confruntaziun cun l’art. Ella sa drizza cun ses programs tant ad in public local sco era naziunal ed internaziunal ed integrescha sistematicamain differentas gruppas socialas.
L’Uniun grischuna d’art s’engascha per in’elavuraziun fundada da l’art preschentà e dat gronda paisa ad ina purschida d’intermediaziun multifara ed interactiva.
L’Uniun grischuna d’art sviluppa cun sias exposiziuns temporaras in ferm profil individual e posiziunescha il Museum d’art dal Grischun en la cuntrada da museums svizra.
L’Uniun grischuna d’art promova l’interess e la chapientscha per l’art, animescha la discussiun publica e dat impuls creativs. Sco instituziun ed a maun da ses programs s’occupa l’uniun da las dumondas urgentas dal preschent, promova l’egualitad dals dretgs en la societad e s’oblighescha al princip da la persistenza culturala, sociala, economica ed ecologica.
Lingias directivas
1. Las exposiziuns temporaras da l’Uniun grischuna d’art preschentan posiziuns artisticas d’auta qualitad ed accents tematics particulars cun ina gronda relevanza per il Grischun.
La cuntrada e la cultura specifica han marcà l’art en il Grischun. Fitg impurtant per il Grischun è ultra da quai da vegl ennà il barat cun il mund: per artistas ed artists è il Grischun il punct da partenza ed il lieu da destinaziun; els portan las particularitads or en il mund ed il mund en il Grischun. Quest sistem da barat dat a l’art en il Grischun in’identitad particulara.
Las exposiziuns temporaras da l’Uniun grischuna d’art s’orienteschan tenor quests parameters. Els èn ils pli impurtants puncts da referiment per il program d’exposiziuns cun preschentaziuns monograficas d’art istoric u contemporan sco era per exposiziuns tematicas che cumpiglian las pli differentas modas d’expressiun e medias artisticas.
Il connex cun la situaziun culturala specifica renda il program d’exposiziuns da l’Uniun grischuna d’art incumparabel e creescha per il Museum d’art dal Grischun in segn distinctiv exclusiv.
2. Las exposiziuns temporaras da l’Uniun grischuna d’art collian sco in artg il passà ed il preschent. Ellas reflecteschan la tradiziun en il preschent e tegnan quint schebain da la diversitad artistica e sociala sco era da las pretensiuns a l’art ed al museum che sa midan d’in cuntin.
La villa istorica e l’edifizi nov furman in rom architectonic che collia il passà ed il preschent. Ensemen cun la collecziun creschida istoricamain ed amplifitgada cuntinuadamain creescha quel in context specific per las exposiziuns temporaras.
Las cundiziuns da spazi e las relaziuns temporalas dal Museum d’art dal Grischun mainan ad accents programmatics tar las exposiziuns temporaras. L’art preschentà entra en in dialog cun l’istorgia e sondescha a basa da quella vias vers l’avertezza.
Cun la villa e l’edifizi nov stattan a disposiziun per la collecziun e las exposiziuns temporaras differentas situaziuns da spazi: vastas localitads neutralas en l’edifizi nov sco era cabinets pli intims en la villa. Ultra da quai in «labor» sco pitschna halla d’art. Las exposiziuns temporaras vegnan integradas en il museum parallelamain cun la preschentaziun da la collecziun u en dialog cun quella. En il senn d’ina tribuna d’experiment po il «labor» era servir sco princip per crear exposiziuns pli grondas.
3. Il barat è in motiv directiv da la confruntaziun artistica en quest lieu e marchescha il program d’exposiziuns da l’Uniun grischuna d’art.
L’interacziun da dadens e dadora che ha marcà istoricamain la situaziun culturala specifica en il Grischun ed influenzescha vinavant il preschent, sa manifestescha en tuts dus edifizis da museum sco er en la ritga collecziun d’art.
Il motiv directiv dal barat influenzescha la tscherna da las singulas exposiziuns temporaras da l’Uniun grischuna d’art sco era las retschas da program realisadas a lunga vista: las posiziuns artisticas chattan lur relaziun cun il lieu ed ils temas locals sa laschan considerar a moda universala.
Per pudair promover il barat èsi necessari da cooperar cun partenaris, tant per l’organisaziun sco era la realisaziun dals programs. L’Uniun grischuna d’art è perquai dependenta d’ina rait da partenaris naziunala ed internaziunala.
La ferma identitad culturala che furma il rom da referiment per il program da l’Uniun grischuna d’art, è averta envers novaziuns. Ella è dinamica e dispona d’ina dimensiun sondanta e speculativa. Per realisar il program èsi perquai lubì da s’exponer a ristgas artisticas, far ipotesas surprendentas e promover la discussiun publica. Midadas da perspectiva grazia a la collavuraziun cun curatur*as envidad*as e l’integraziun da differentas culturas èn giavischadas.
4. Las exposiziuns temporaras ed occurrenzas da l’Uniun grischuna d’art promovan la confruntaziun cun l’art. Ellas sa drizzan tant ad in public local sco er ad in public naziunal ed internaziunal. L’Uniun grischuna d’art sa stenta spezialmain da pledentar differentas generaziuns e gruppas socialas.
Las exposiziuns da l’Uniun grischuna d’art duain avair in’irradiaziun particulara. La qualitad è pli impurtanta che la quantitad. Quai vala tant per il program sco era per il dumber da visitadras e visitaders.
L’Uniun grischuna d’art s’engascha en sias exposiziuns temporaras per in’elavuraziun fundada da l’art preschentà e porscha differentas pussaivladads d’approfundaziun. Per las preschentaziuns monograficas e las exposiziuns tematicas realisescha ella per regla in catalog attractiv d’auta qualitad artistica che permetta novas vistas sin l’art preschentà e cuntanscha differentas gruppas en mira. Parallelamain porschan occurrenzas specificas ulteriuras pussaivladads d’access, creeschan novs contexts e pledentan uschia novas gruppas en mira.
L’Uniun grischuna d’art dat gronda paisa ad ina purschida d’intermediaziun multifara ed interactiva. Las visitas guidadas publicas e privatas promovan la chapientscha per l’art preschentà. Ellas èn er ina purschida sociala che unescha ils umans ed als collia cun il museum.
5. Ina concepziun dal program clera e specifica ed ina communicaziun avanzada augmentan l’attenziun per il Museum d’art dal Grischun.
L’Uniun grischuna d’art sviluppa cun ses programs in ferm profil individual e posiziunescha il Museum d’art dal Grischun en la cuntrada da museums svizra.
L’Uniun grischuna d’art metta gronda paisa sin contacts cun instituziuns da cultura chantunalas, naziunalas ed internaziunalas e sa vesa sco partenaria engaschada e vardaivla en la collavuraziun cun auters acturs.
L’Uniun grischuna d’art promova sin differents stgalims e cun agid da divers meds sco ina communicaziun activa sia preschientscha en medias localas, naziunalas ed internaziunalas. En quella moda gida ella er ad engrondir l’intschess dal museum. L’attenziun è drizzada en spezial sin la digitalisaziun s’avanzanta da noss mintgadi. Per quai vegnan natiralmain era sviluppads formats d’intermediaziun digitals.
Sco instituziun culturala suonda l’Uniun grischuna d’art ils princips formulads en quest maletg directiv. Ella tgira questa cultura cun la premura necessaria vers anen e vers anora.
Ils statuts da l’Uniun grischuna d’art
Sut il num «Uniun grischuna d’art» exista in’uniun en il senn da l’art. 60 ss. CCS cun sedia a Cuira. L’uniun è vegnida fundada l’onn 1900. L’Uniun grischuna d’art è ina secziun da la Societad svizra d’art.
L’Uniun grischuna d’art ha l’intent da svegliar e da promover en il chantun l’interess per l’art figurativ en sia diversitad mediala. En il rom dal contract concludì cun il chantun Grischun sco possessur dal Museum d’art a Cuira realisescha l’Uniun grischuna d’art exposiziuns d’ovras da l’art figurativ.
Ils commembers stattan sco promoturas e promoturs en stretg contact cun l’art e cun il Museum d’art dal Grischun a Cuira e profiteschan da blers avantatgs.
L’uniun grischuna d’art è responsabla per la butia dal museum e per il café dal museum.
L’uniun grischuna d’art. Purtret da arttv.ch
L’uniun grischuna d’art è responsabla per il program d’exposiziun dal museum d’art dal Grischun. Ella finanziescha la preschentaziun d’exposiziuns temporaras interessantas, in program d’occurrenzas persvadent, ils catalogs d’exposiziun e las publicaziuns.