Contact
Las commembras ed ils commembers da l'uniun grischuna d'art prestan ina contribuziun centrala al mantegniment, a la promoziun ed a l'intermediaziun d'art e da cultura en il Grischun.
Cun quai sustegnan ellas ed els er il museum d’art engrondì e gidan da rinforzar sia attractivitad per il public e d’al render enconuschent sco chasa d’art lunsch suror ils cunfins chantunals. Il medem mument èn quai las commembras ed ils commembers che fan cun lur engaschament e cun lur interess or dal museum d’art dal Grischun a Cuira in lieu d’inscunter inspirant.
«Cumbain che jau m’interessava gia d’uffant per l’art, na sun jau ditg betg stada conscienta quantas artistas grischunas e quants artists grischuns da renum ch’i dat. Grazia a mia commembranza en l’Uniun grischuna d’art hai jau emprendì d’enconuscher e da stimar l’art en e dal Grischun.»
«L’Uniun grischuna d’art promova l’experientscha da l’art e la confruntaziun cun l’art, e rinforza damai er il pensar da la contempladra e dal contemplader.»
«La commembranza en l’Uniun grischuna d’art è in invit permanent per viadis en auters munds – mintgatant èn quai munds colurads, armonics ed equilibrads, mintgatant era munds stgirs, abstracts e betg chapibels, ma i vala adina la paina d’als visitar.»
«L’uniun grischuna d’art – mes profit: rinforzar il spiert, inscuntrar umans, survegnir ideas e mintgatant in magiel vin.»
«Inscunters tranter ils umans e l’art collian. L’Uniun grischuna d’art permetta adina puspè tals inscunters en las furmas las pli differentas. Per nus è era quai in motiv da far part da l’Uniun grischuna d’art.»
«Il Museum d’art dal Grischun è il dachasa da las artistas e dals artists grischuns ed era da blers auters. El intensivescha mia egliada per la lavur artistica indigena e per l’art en il vast mund. Jau ma regord era gugent a las visitas dal museum impressiunantas cun mes scolast da dissegn Emil Hungerbühler (1914–2002), lezza giada conservatur da la Chasa d’art dal Grischun. L’Uniun grischuna d’art gida a tgirar e cultivar quest bellezza curtin da l’art.»
«L’art è ina funtauna da regiuvinaziun da la vita – las exposiziuns, il museum d’art e l’uniun d’art èn ses batschigl.»
«L’Uniun grischuna d’art è per mai l’intermediaziun activa d’activitads e d’interess artistics. Ella furma ina grondiusa simbiosa cun il Museum d’art dal Grischun – perquai fatsch jau sco commember gugent part dad ella.»
«Mia commembranza sur blers onns en l’Uniun grischuna d’art sa chapescha per mai da sasez. L’art figurativ e la musica m’han interessà dapi mia giuventetgna, han ina gronda impurtanza en mia vita e l’enritgeschan fermamain. Bun ch’i dat l’UGA, pertge ch’ina commembranza animescha adina puspè da visitar il museum. Quai che jau appreziesch fitg en l’UGA èn ils inscunters occasiunals ed ils discurs prezius cun umans interessads a l’art.»